Ulloq unnuarlu paaqqinnittarfiit

Namminersorlutik Oqartussat sinerissami paaqqinnittarfiutai:

Ulloq unnuarlu paaqqinnittarfiit arlalissuupput assigiinngitsorpassuarnik pisariaqartitsisunut najugassiaasut naleqqussagaasullu, annertuumik innarluutilinnut paaqqinnittarfiit kiisalu meeqqanut inuusuttunullu paaqqinnittarfiit amerlanerit Naalakkersuisoqarfimmiit ingerlanneqarput.

Sullinneqartut assigiinngissutaat pissutigalugit, soorlu ukiui, innarluutaat, sumik nappaateqarneri, inissinneqarnerminni pisariaqartitaat pissutaallu, ulloq unnuarlu paaqqinnittarfiit aamma taama assigiinngissuteqartigaat, tamannalu assigiinngitsunik sunik ilinniagaqarsimasunik sulisoqarnerisigut aamma takuneqarsinnaavoq.

Nittartakkami uani suliffeqarfinnut ataasiakkaanut attaveqarnissamut paasissutissat pisariaqartut tamaasa nassaarisinnaavatit.

Meeqqanik, inuusuttunik imaluunniit inunnik annertuumik innarluutilinnik inissinneqarsimasunik suliaqarneq kommunit sallersaallutik suliassarivaat, taava Naalakkersuisoqarfik DCV aqqutigalugu sulianut ataasiakkaanut tunngatillugu kommuninut aamma ulloq unnuarlu paaqqinnittarfinnut attuumassuteqartunut akunnermiliuttarpoq.   

Naalakkersuisoqarfiup Kalaallit Nunaata Sinniisoqarfiani immikkoortortaqarfia

Kalaallit Nunaanni periarfissat tamarmik nungussimagaangata, meeqqat inuusuttullu aamma/imaluunniit inuit annertuumik innarluutillit Kalaallit Nunaata avataanut inissinnissaat pisariaqalersinnaasarpoq. Nalinginnaaneruvoq Danmarkimut inissiisoqartarnera.

Københavnimi Kalaallit Nunaata Sinniisoqarfiani Naalakkersuisoqarfik immikkoortortaqarfeqarpoq, tassani sulisut inunnik inissiisoqassatillugu angerlartitsisoqassatillugulu Kalaallit Nunaanni kommunenik pingaartumik ikiuullutillu ilitsersuisarput, Kalaallit Nunaanni kommunit Danmarkimilu kommunit akornanni attaveqartitsisuullutik, Kalaallit Nunaanni kommunit sinnerlugit ataatsimiinnernut peqataasarlutik, tikeraarnissanik pilersaarusiortuullutillu aaqqissuisuusarlutik, kisitsisit atorlugit nassuiaasiortarlutik kiisalu inuit taakku pillugit aningaasaqarnermut tunngasunik isumaginnittuullutik.

Immikkoortortaqarfik qallunaat kommunii aqqutigalugit Danmarkimi najugaqarfissatut neqeroorutinut naleqquttunut akuerisaasunullu attaveqartitsisarpoq inissiinissaq immikkut ittunik neqeroorutinik pisariaqartitsigaangat Kalaallit Nunaanni pigineqanngitsunik, imaluunniit neqeroorutit pilersinnissaat Kalaallit Nunaanni ajornakusoorsimagaangat.

Inuit Danmarkimi inissinneqartut qallunaat inatsisaasa ataanni sullinneqartarput, Kalaallit Nunaanni isumaginninnermut inatsisit Danmarkimi atuutinngimmata. Malittarisassat tikeraarluni angalanerit aamma Danmarkimi Kalaallilluunniit Nunaanni ineqariaatsinik neqeroorutit pillugit Socialministeriaqarfiup nalunaarutaani nr. 1389, 12. december  2006-imeersumi allaaserineqarput.

Immikkoortortaqarfiup innuttaasoq najugaqarfissatullu neqerooruteqarfiusoq qanittumik attaveqarfigisarpai, najugaqarfissatullu neqerooruteqartut neqeroorutigisaannut ilisimasaat inissiineq sioqqullugu, inissiinerup nalaani aammalu inissiinerup kingorna pingaaruteqaqaat.

Inuit Danmarkimi najugallit assigiinngequteqaqaat, ukiumikkut, sumik nappaateqarnermikkut, innarluuteqarnermikkut, nakorsarneqarnissamik pisariaqartitsinermikkut kiisalu qanoq sivisutigisumik Danmarkimi najugaqarsimanermikkut.